وعليكم السلام ورحمة الله وبركاتة
اهلا ومرحبا بك اخى العزيز

بالنسبة لسؤال حضرتك عن الأسر فهو مينفعش نقول ان المنطقة الفلانية دى عاشت فيها أسرة معينة وبالتالى هى دفنت فيها وعملت مقابر ولا لأ .

لأن احنا الان فى زمانا هذا كل شئ تغير عن ايام قدماء المصريين بمعنى ان مصر قديما كانت عبارة عن اقاليم وعواصم وتجمعات وتمركزات ... الخ
ولو نظرت على الفترة الزمنية السابقة ستجد ان تاريخ الحضارة المصرية القديمة الى زمانا هذا عدة الاف من السنين .. وخلال كل تلك الفترة تعاقبت اجيال واجيال على أرض مصر .

يعنى الموقع الواحد تعاقبت عليه عدة اجيال او اسر او حضارات كثير .

لكن لكل موقع طبيعته وشواهدة الأثرية
بمعنى

عملنا مسح اثرى لمنطقتك وكانت كل الدلائل الاثرية تابعة لليونان والرومان اذن الموقع يصنف انه خاص بالحقبة اليونانية الرومانية .. ظهرت دلائل مثلا للعصر القبطى او المسيحى تضاف على السابق ويصبح الموقع خاص بالعصر اليونانى الرومانى وتم استخدامه فى الفترة المسيحية .. وهكذا

الحكم على موقع جغرافى معين هو تابع لأى حضارة ذلك يتطلب مسح أثرى شامل مع نتائج للحفر .

بالنسبة للنقطة الاخرى
ان الموقع به كسر فخار بكميات كبيرة متعددة الاشكال
فذلك دليل قوى على ان الموقع مدفنى
بمعنى
ان تلك التباب او المنطقة التى بها بقايا ومخلفات الحياة اليومية عبارة عن منطقة مدفنية او جبانة كبيرة جدا .

بالنسبة لاعماق الدفائن فمش لها قاعدة ثابته
بمعنى ليس لها عمق محدد او دفن باطوال ومقاسات محددة .
وسيبك من الجهل اللى بيغنى بيه مدعى العلم ان الدفنات على عمق مش عارف كام بالسنتيمتر وان طبقات الارض بالسنتى متر ويفضل يحطلك مقايس بالشعرة يعنى هتفرق كتير معاه ثلاثة متر من ثلاثة متر الا 20 سنتيمتر !!

مفيش قاعدة ثابته للاعماق
لكن فى نمط ثابت للدفن
بمعنى
ان دفنات القبور تكوم فى نمط واحد متناسقه تقريبا فى الاعماق وطريقة الدفن .
المقابر تكون مبنية بطريقة متشابه ولكن ليست متطابقة .
يعنى فيه تشابه وتناسق مش تطابق بالملى
دا اسمه انماط الدفن .

بالنسبة للمياة اللى بتقول عليها جوفيه فدى مش مياه جوفية .
هما لما دفنوا زمان موقعك دا كان صحراوى جبلى قاحل مش تجمع سكانى او حضرى .
المياة اللى بتظهر الان دى رشح البيوت والزروع .

الموقع بإحتمال قوى عبارة عن جبانة كبيرة بها مخلفات كثيرة وابنية ومقابر .
المقابر يطول شرحها
فلو فى اى شواهد او ادلة ظهرت معاك صورها
ولو فى اى استفسار اتفضل
بالتوفيق

جزاك الله خيرا اخي، ، استفدت كتير من جوابك وجلست مع اكتر من واحد من كبار السن عندنا ومعظمهم دلوني علي اكتر من مكان شافو فيه علي وصفهم انه سور تحت الارض حوالي مترين وعرضه حوالي متر الا ربع تقريبي ف ان شاء الله هنفحر علي واحد فيهم نشوف ايه دا ولما نلاقيه هصوره وان شاء الله نتابع مع حضرتك،، مشكوور اخي

كسر الفخار دا موجود عندنا بكثره هل واضح منه الي اي حضاره ينتمي؟ موجود بكميات كبيرة تحت الارض وفوق سطحها المكان كلو ارض طينيه وبجواره علي طول ارض رمليه كنت قريت معلومه ان لو في ارض رمل في مكان يشتبه في اثريته بنسبة كبيرة بيكون الدفن في منطقه الرمل مش عارف المعلومه دي صح ولاوغلط المهم جربت اسياخ نحاس لقله الامكانيات مفيش امكانيه نجيب جهاز وجربنا في ارض الرمل دي المهم انه مفروض أشر علي فراغ ان كان صح ولا غلط مش عارف، استفساري اخي هل معلومه الدفن في ارض رمليه لو وسط الارض الطينيه فعلا صح؟ ودا فيديو لبعض الفخار جمعته من سطح الارض عينات كدا https://youtu.be/_ocNVc2Tjrg

حاول ترفق صور على المنتدى .

بالنسبة لسؤالك
فى زمانهم قديماً مكنش الدفن فى الأرض الطينية ولا حتى التى بها نسبة رطوبه!

الدفن كله كان بيتم فى الصحراء القاحلة او فى التبات العالية
ومعظم الدفن بيكون فى المناطق المجاورة لمناطق معيشتهم ونشاطهم السكانى بالقرب من وادى النيل
يعنى الجبانات والقبور الفردية والمقابر المبنية بتكون على اطراف البلاد فى المناطق الصحراوية .

معنى وجود رمال متلاصقه مع موقعك دا مش معناه ان الرمل قريب منك دا معناه ان موقع دا كله اصلاً قديما كان صحراء .
والعمق الطينى الترابى دا بيكون تراكمات طبيعية مع مرور الزمن والنشاط العمرانى والزراعى
او تراكمات منقوله بالايد عن طريقهم .

بالنسبة لأسياخ النحاس
فهى ممكن متكونش ذات جدوى مع الدفنات والمقابر الخاصة بالحضارة المصرية القديمة
الا فى بعض الحالات فقط .

بارك الله فيك اخي، ممكن طريقه لارفاق الصور علما اني داخل موبيل مش كمبيوتر، حاولت كتير ومعرفتش مش موجود ايقونه لارفاق الصور

السلام عليكم، اليك الوضع اخي طلحه صور كسر الفخار دي لعلها تفيد في تحديد الحضاره موجود على سطح الارض في منطقه هي ارض زراعيه تقريبا ممكن يكون طلع علي السطح من اثار تقليب الارض للزراعه وكدا، المهم اعتمدنا علي الله وبدأنا فحر سطح الارض ارض طينيه تقريبا اربعين سنتيمتر وبعد كدا طبقه رمل مائله للاحمرار مع زلط صغير متماسكه الي حد ما ويعد كدا رمل اصفر في اوله لقينا الجره اللي في الصور اللي في المشاركة السابقه حفرنا كمان متر كلها رمل صافي ودي حاجة تعتبر غريبه في بلدنا لان معروف عندنا ان الرمل علي خمسه متر وكنت قولتلي قبل كدا ان المنطقه كانت صحراء رمليه فعلا الواضح انها كانت صحرا، المتر اللي ف الرمل دا مقبلناش كسر فخار ولا اي شي باستثناء الجره،، وبعدين طلعت علينا ميه من الجوانب نظرا لقرب المكان من ترعه علي مانعمل او خنزيره او نجيب ماسوره قطر كبير، فارجو منك الافاده هل كسر الفخار واضح انه لاي حضاره ينتمي، والجره دي هل تدل علي شئ، عايز رأيك في الموضوع ككل، ونأسف علي التعب وربنا يباركلنا في علمك وجهدك، وسبب الحفر ف المكان دا تحديدا بناء علي اسياخ نحاس انا عارف انها مش مجديه اوي في كل الحالات بس للاسف مفيش امكانيات لاجهزه وقولنا اهو نجرب ولعل الله يرزق،

الله الله يا خال طلحه

منور يا أخ مؤمن
حمد لله على السلامة

ازيك اخى الشرقاوى

الموقع مدفنى زى ما قولتلك
وكسر الفخار السطحية بقايا الدفن
لأن جنب القبور والمقابر كانوا بيكسروا فخار مع الزيارة للميت والطقوس ... الخ

بإحتمال كبير ان بقايا الفخار دى يونانى رومانى
بس دا ميمنعش وجود دفنات اخرى للأسر المصرية القديمة قبل الحقبة الرومانية .

وزى ما قولتلك التبة دى كانت صحرا يعنى رملة سايبة فى زمانهم

بالنسبة للجرة الفخار
فعندك احتمالين
الأول انها خاصة بقبر بسيط سطحى
لان الدفنات الرومانية البسيطه بتكون سطحية وبيكون بجوار رأس الميت بعض الجرار الفخار زى دى
بس دا مش قاعدة ثابته فى كل قبر
فلو كانت خاصة بقبر كان لابد من وجود عظام او بقايا عظام بجوارها
بس بالنسبة لظروف موقعك الرطب فممكن تكون كل العظام تحللت .

الاحتمال التانى
ان الجرة من نفس البقايا السطحية بتاعت الفخار المتكسر ونظراً لانها طمرت على عمق فممكن تكون احتفظت بحالتها .


لو دا قبر فهيعوز توسعة افقية فى نفس المستوى اللى ظهر فيه الجرة مع التأكد تماما من هشاشة التربة ووجود عظام من عدمه .

لو دى بقايا ومخلفات دفن فهيتطلب الموضوع ايضاً توسعه افقية ولكن مع حفر رأسي
لان موقعك ممكن يكون فيه مقابر من النوع المبنى .

بس للأسف الموقع ضايع فى الرشح بتاع الزرع والترع
فهيكون صعب جداً جداً التعمق لأسفل
وعمل الخنزيرة انا لا انصح به لانه بيخليك مقيد نفسك تماماً فى ابعادها ونازل رأسي مباشرة وانت مش عارف نفسك نازل على ايه اساساً

الموقع مدفنى بس الزرع والمياه الجوفيه هتصعب فيه العمل جداً .

لو فى اى استفسارات ضعها ولو جد معاك اى جديد بلغنا
متابع معاك

بارك الله فيك اخي، كفيت ووفيت، فعلا العلم ورث الانبياء كما قال نبينا صلى الله عليه وسلم، فعلا مياه الرشح مصعبه الوضع جدا بس ادينا بنتحاول نتغلب علي مشكلتها وربنا يوفق، بخصوص ان الجره كانت في قبر هنتاكد منها لانها ظهرت في حافه من حواف الحفر فمخدناش بالنا م التربه المحيطه بيها ككل وبعدين عشان رمله سايبه خالص وفيها رطوبه فكلها شبه بعض ملحظناش هشاشه في التربه، استفساري بخصوص المقابر المبنيه في العصر دا شكلها غالبا بيكون ازاي كنت قريتلك رد في موضوع تاني انهم زي حفرو حفره كبيره وبنو مقابرهم بطوب احمر او حجر جيري وردمو الحفره، يعني المفروض اني انزل على جسم المقبره علي طول ولا زي الفراعنه ابار دفن وكدا،؟ تاني حاجة العمق المتوقع غالبا كام تقريبا، وهل لو الجره كانت بقايا قبر دا بينفي ان في مقبرة تانيه تحت، ولا عادي يبنو قبر فوق قبر؟ اخر حاجة لو في حاجة تحت هل الميه الجوفيه تفقدها قيمتها؟ وشكرا اخي الكريم

بارك الله فيك

بالنسبة لسؤال حضرتك
فالمقابر عامة مالهاش قاعدة ثابته لطريقة البناء
يعنى مش كلها ستامبا واحده

فى حاجة اسمها نمط يعنى بيكون فى تناسق وتناغم بين نوعية المقابر بنفس الحقبة الزمنية
وبالطبع فى اختلافات كبيره بين كل مقبرة واختها .

لو دا موقع دفن رومانى يعنى جبانة كبيرة
فممكن تكن الدفنات عبارة عن هياكل عظمية او مومياوات ملفوفة بكتان
ومحطوطه كلها فى قبور سطحية
يعنى حفرة بالرمل على اد الميت ومحطوط فيها الميت

لو الموقع مهم او فيه طبقات صخرية او بالقرب منه تبة حجر ممكن تكون فى ابار مقطوعه بالصخر
وبرضو ممكن فى الرمل السايب دا تلاقى مقبرة مبنية من الحجر او من الطوب الاحمر
مقدرش احصر ليك اشكال وانواع المقابر كلها دلوقتى

بس بإختصار لو بتحفر فر رملة بموقع أثرى مدفنى ولقيت اى جزء من بناء حجرى او طوب فدا بيكون جسم المدفن .

بالنسبة للمقبرة اللى بيتحفر لها حفرة ويبنوها ويردموها فدا فى المقابر الفردية
ودى موجود منها فى ابيدوس الدولة القديمة .
ومبنية من الطوب الللبن والاحمر ولها عدة أشكال
بالنسبة للعمق فمفيش له قاعدة ثابته
بس بإختصار طالما الرديم اللى بتحفر فيه فيه بقايا مخلفات ولو حتى حبة قش او شعراية او خيط قماش فكمل تنضيف فيه.

لو دا كان قبر فمش هيكون تحته شئ اخر لو قبر سطحى لان القبور والدفنات الرومانية السطحية مبيكونش تحتها دفنات اخرى .
لكن ممكن جبانة تكون وش الارض بتاعها رملى وبعد 3 متر صخر فهيدفنوا فى الرمل الدفنات السطحية ويقطعوا بالصخر ابار للدفن .

المياه الجوفيه بتأثر على المواد العضوية فقط
زى الجثث والاخشاب والسوائل ..الخ

وبتأثر على المعادن الغير نفيسة بتخليها تنجنزر وتتأكل

ومش بتأثر المياة الجوفيه على المعادن النفيسه زى الدهب والفضة ولا على الاحجار الكريمة ولا التماثيل الحجرية الصلبة .

السلام عليكم ورحمة الله وبركاته، كيف الحال اخي طلحه،، معلش الصور متلخبطه في بعضها وعشوائيه، اليك الوضع الجره اللي قابلنها قبل كدا اتاكدنا انها كانت قبر سطحي فعلا لاننا قابلنا وحده تانيه هي والمكحله اللي ف الصور دي وجمبهم بعض بقايا عظام، وفي نفس المستوي بعدها بشويه لقينا البتاع القماش اللي ف الصور شبه اللي كان بيلبسه الجنود تحت الخوذه في الافلام، او بتاع وحده بتلبسه علي شعرها معرفش، المهم واحد كبير في السن من اهل البيت قلنا وهو بيحفر خزان قديم لقي سور تحت متر ونص تقريبا وغير مكان الخزان عشانه بينا وبين السور دا حوالي خمسه متر فقولت هحفر فحر افقي بطول الخمسه متر دول اشوف ايه هيقابلني علي امل الاقي سور مقابل ليه في حدود المكان اللي بحفر فيه لان التاني بره وصعب الحفر عليه حاليا، بطول الحفر الارض طبيعيه ورمليه عادي وقابلنا الدفن السطحي اللي لقينا معه المكحله، قبل السور تقريبا بمترين او تلاته الارض طينيه شبه الصلصال حفرها بصعوبة وفيها كسر فخار بنسبه كبيره اضافه الي بعض الاحجار شبه الصخور غريبه علي طبيعه المكان عندنا موجوده في الصور وكمان بعض قطع ماده بناء شبه الاسمنت تقريبا بس اكتر صلابه شويه ملزوق فيها قطعه فخار او قطعه حجر شبه الصوان كدا،، والصفه الغالبه في طبيعتها طين صلصال اوقات تلاقي فيها عرق رمله ويختفي واولها من فوق كانت حمره كسر طوب احمر فعايز اعرف راي حضرتك هل نكمل في المكان اللي احنا فيه دا لحد لما نشوف اخر المخلفات دي ايه مع العلم ان لسه الارض طينيه لحد اتنين متر وباقي المكان الرمل الصافي بيظهر علي نص متر، ولا نحاول نفحر ع السور رغم انه هيكون صعب عشان خارج المبني اللي احنا فيه، مع العلم ان اللي شاف السور ووصفه انه مبني علي طوبتين بماده تشبه الجير دور طوب عادي ودور علي سيفه،، وهو ميعرفش بدايته ولا نهايته هو كشف جزء م النص وخلاص بالصدفه،، حاسس ان الكلام متداخل في بعضه وملخبط شويه بس ثقتنا في ذكائك كبيرة وانك حتفهم الوضع ان شاء الله،، تاني مكاني اللي نازل فيه باختصار يبعد عن السور حوالي اتنين او تلاته متر بالكتير والسور جاي من الشرق للغرب وبالنسبه للحفر هو اتجاه الشمال، والطوبه بالوصف عريضه وقصيره،، وبالنسسبه للبتاع القماش ايه دي هههه وهل ليها لازمه، دمت بود اخي وجزاك الله خيرا علي جهدك معنا وعلمك، ولو محتاج مزيد من الشرح اتفضل،