السلام عليكم ورحمة الله وبركاته

الساده خبراء المنتدى ارجو منكم ان تساعدوني في التخلص من هذا الرصد او ان تدلوني على شخص يمكن ان يتغلب عليه شرط بالقران والسنه والمكان في ضواحي الجيزة


اولاً: اسباب الحفر
ارجو ان يكون عندكم سعة صدر تحديداً في هذه النقطة لانها تبعد عن المنطق
بدايتاً كان يراود اصحاب البيت احلام وكوابيس
بان اطفال مقطوعين الرأس ويرتدو فرعوني رغم ان اصحاب المكان ناس بسيطه جداً متعرفش اللبس الفرعوني اصلاً هما اعدو يوصفولي الملابس لحد ما وريتهم صوره قالولي نفس الملابس دي
ثانياً في غرفة معينه يتم حدفهم بالحجاره وهما صاحيين
المهم قررنا نبدأ

ثانياً : الحفر
المكان داخل بيت فعملنا خنزيره صاج قطرها متر ونص وبدانا حفر وانا بصراحه مش خبير في انواع التربة المهم بعد حوالي ٣ متر لقينا طينه تشبه الشوكولاتة وفيها حاجات زي التبر او تبر معرفش المهم بعد الطينة دي قابلتنا رمله ناعمه فيها بردو حاجه زي التبر وطبعاً شقف و فحم صغير لكن بكثره وايضاً عثرنا على قواقع حلزونيه صغيره جدا سأحاول ان ارفق صوره وصور اخرى وكل ما ننزل طبقه الي بعديها تبقى انعم لحد ما لقينا اعزكم الله قضيب ذكري غير مكتمل مكسور يعني واعتقد من الصخور ولونه مائل للحمرة ولزيادة التفصيل المقصود بانه غير مكتمل عدم وجود الخصيتان مكسور قبل ذلك وانا اذكر هذا لانني اعلم ان لها اهمية في عالم التنقيب
المهم كملنا وطبعا الشقف والفخار بيطلع وكمان بيطلع حاجه كده زي الطوب الاحمر او اخضر قطع صغيره وفحم و كمان كان بيطلع حجر كلسي لونه ابيض برده قطع صغيره وهتسألوني عرفت انه كلسي منين طبعاً عرفت من المنتدى الجمييييل بتاعكم عن طريق الكشف من خلال الليمون والكلام ده كان على بعد حوالي ٦ متر
لحد لما الخنزيره اتعلقت على حاجه تشبه البلاطة على عمق ٧.٥ لكن مكانش باين منها تحت الخنزيره غير زاوية على حرفv عشرة سنتي بس والباقي مش باين من تحت الخنزيره وطبعا المياه كانت عملالنا مشاكل كتيييييير
المهم وارجو تفهم الموضوع وانا اقسم بالله انه حدث امام عيني هذه قبل ان نعرف بوجود هذه الزاويه كان واحد من الي شغالين تحت المهم لمس الزاويه وبعدين طلع يجري من الخنزيرة واترمى على الارض وجالو تشنجات وكان عامل كأن جسمة بيمر فيه تيار كهربائي لمدة عشر دقائق المهم كلنا كنا عارفين قبل الحفر ان الشخص ده كان ومازال معمولو عمل وحاجات كده بدون الدخول في تفاصيل ف قولت جايز يكون ده السبب
المهم نزل اتنين غيره يكملو شغل بعد دقيقة ما نزلو واحد اغم عليه جوه الخنزيره وجالو نفس الحاله بس اشد قام التاني اللي تحت ماسكة عشان ميقعش من طوله ويغرق في الميه لانها كانت عاليه المهم فضل ماسكه لحد ما جالو نفس الحاله قمنا منزلين واحد تالت خالص يطلعهم المهم طلعناهم الحمد لله وبعد ما الشخص التالت طلعهم اترمى على الارض وجالو بردو نفس الحالة بقو كده اربع اشخاص مرميين في الارض كلهم في حاله غرييييييييبه جداً وانا اقسم بالله انه حدث امام عيني المهم طبعا انا كنت بشرف على اعمال الحفر بحكم اني متعلم وقارئ جيداً عن اساليب استخراج الكنوز بالطرق الشرعية. وهذا ما كنت اشطرته عليهم عدم الاستعانه بالدجالين لانه كفر بالله
المهم بعد لما حصل قولتلهم هل كنتو متحصنين بالله وباالاذكار قالولي لأ وطبعاً قولتلهم ده السبب وكانو خايفين ينزلو تاني فكان الطريقة الوحيدة لاقناعهم هي اني انزل وانا متحصن عشان يعرفو ان الاستعانه بالله اقوى من اي شيئ ونزلت بالفعل ولمست الزاويه دي والحمدلله محصليش حاجة ونزلو بعدي وهما متحصنين ومحصلش حاجة وبعديها بكام يوم واحد فيهم نزل وكان مستهتر شوية بالتعليمات ومكانش متحصن وحصلو نفس القصه لحد ما تعلم الالتزام من الي حصلو لتاني مره وكلهم فهمو ان الموضوع مش هزار
المهم قررنا نكمل بعد عمق الزاوية الي قابلناها لحد لما خلص الرمل والزلط وقابلنا رمل ناعم برده لكن مختلط معاه رمل متحجر هو سهل الكسر بس كان موجود بشكل كبير وخلصت الطبقة دي وظهرت طبقه اخرى على عمق حوالي ٨ متر ونص وكانت طبقة غريبة الشكل والملمس كانت تشبه الصلصال لكن اشد بكثييييير وكان ممن نقعد يوم واحد شغل منشلش منها غير عشرة سنتي وطبعا الميه كانت عامللنا ازمات كبيره وكانت الطبقه دي عازله للمياه ومبتتاثرش بيها خالص وكان كل ما ننزل تبقى اشد من الاول لحد لما بقت اشد من الاسفلت لحد لما وصلنا لعمق ٢ متر في الطبقة دي وكنا شغالين بالغاطس طبعاً ولحد مانوصل لعمق معين في الطينة دي مره وحده نلاقي مياه مختلطة برمل شدييييييييدة جداً لدرجة انها ممكن تدفع انسان على الارض ونلاقي المترين الي نزلناهم اتردمو رمل تاني مش نفس نوع الصلصال بتاع الطبقة الي احنا فيها و فضلنا على الحال ده نشيل وتتردم نشيل وتتردم شهر ونص لحد لما قريت انه ممكن تكون مياه رصد وانا مش بصدق اي حاجة الا لما اشوفها بعيني مع اني عااااااارف ان في ناس هتهاجمني في هذا الموضوع لكن قريت في عديد من المنتديات انك تعرف ازاي اذا كانت مياه جوفيه او رصد وان مياه الرصد بتكون رائحتها كريهة وكانت واقريت كمان ان مياه الرصد اذا وضعت على شخص ممسوس بتاكلة او بتهرشه وفعلاً جربت الموضوع ده على كذا حد ممسوس وفعلاً هرشته جامد جدا كأنها مية نار قولت اجربها على اشخاص سلام معملتش اي حاجه والعمال الي شغالين في المكان بيعومو فيها عادي مع اني شوفت من خلال متابعتي لمشاركات الاستاذ الفاضل ادهم البادي ان لا يوجد شيئ اسمه مياه رصد وانا اثق جداً في علم هذا الرجل العالم لكن اقسم لكم بالله انه حدث لأ وكمان ايه اثناء الحفر مره كنا بنهزر وكنا عمالين نتكلم داخل الخنزيره كأننا بنكلم الناس الي تحت او الرصد بنهزر يعني وبنقول بطل ميه بقى وخلنا نخلص واحنا هنمشي وفي نفس اللحظة زوجة صاحب المنزل كانت في الدور الي فوق نزلت واحنا بنقول الكلام ده بس مسمعتش حاجة وكان وشها وعنيها شكلهم. غريب نفس الشكل بتاع كل مره وقالتلي برده مش هوقف الميه انا وقفت اتسمرت في مكاني وكانت بتتكلم بصيغة المذكر وقالت انتو عايزين كل حاجه بالساهل كده لادم تتعبو قامت بصالي وقالتلي مش انت الخبير الي مشغلهم وانت الي هتفتح قولتلها اه قالتلي انا عاملك حفلة استقبال تحت انا بصراحة خفت قمت قايل طيب متخليش الطينه تفتح تاني وتردم المكان وبعدين انا مش همشي غير لما اطلع الحاجة اللي تحت حتى لو ههد البيت والكلام ده كان في رمضان قالتلي اولا انا ميتي مبتخلصش وممكن اغرقلك البيت كلو وممكن اهدلك البيت لو عايز بس استناني بعد رمضان انت لسه شفت حاجه قولتلها اشمعنى بعد رمضان قالتلي هو كده وبعدين انت لسه مقابلتش الكبير بتاعنا فجه في دماغي موضوع قريته برده ان سحر الفراعنه كان شديد جداً وانهم. في المقابل بيقدمو قربان لمردة الشياطين عشان يعينو حد يحرسلهم المكان وماهو سوى عسكري يحرس المكان وفي بعض الاحيان بيكون عايز يخلص من المكان ويخرج فينبه اصحاب المكان لكنه يظل انه يحاول يعيقهم في شغلهم لان كبيرهم ممكن يموتو اذا فقد الكنز بدون ان يحرسة وعمل اعاقات اثناء الحفر ده الي قريته بغض النظر عن صحته او غير ذلك
جيه الموضوع ده في دماغي فقولتلها برده مش همشي غير ما اطلع الحاجه
قالتلي وريني هطلعها ازاي عموماً انت فاضلك متر ونص قولتلها وبعدين لما تخسري الكنز بتاعك وباذن الله عدينا كل العوائق الي هتعملها ونزلنا هتعمل ايه مع الكبير بتاعكم قالتلي ان ساعتها هقول للكبير ده امر واقع وبعدين انا مش هسيبه بسهوله كدا انا هشل جسم واحد من الناس الي شغاله قولتلها بأذن الله مش هتقدر وبعدين قولتلها اممكن تسلم وانا هقولك تعمل ايه والكبير بتاعك ميقدرش يقربلك قامت مخضوضه مره واحده وقالتلي ايه واذاي قولتلها لما تسلم الاول وقعدت اقرء قرآن قامت وسابتني وجريت
اقسم بالله وانا اقسم غير حالف انه حدث مع العلم ان الناس دي متعرفش اي حاجة في الدنيا عشان يمثلو مثلاً ولا حاجه انا حاطط كل الاحتمالات وبحاول اكذب اللي بيحصل
لكن الناس دي لا تعرف حاجه ولا تعرف تقرا اصلا رغم ان الكلام ده انا قريته قبل كده في احد المنتديات وكنت بقول ده هبل